Парламентот на Белгија изгласа контроверзен закон, со кој на полицијата ѝ се дава овластување да влегува во домовите на мигрантите на кои им е наредено да ја напуштат земјата.
Мерката е дел од поширок пакет мерки на десничарската коалициска влада на премиерот Барт де Вевер, кој има за цел да ја ограничи миграцијата и да ја забрза депортацијата на луѓе чии барања за престој се одбиени.
Поради усвоениот закон, во средата вечерта околу 3.000 луѓе формираа човечки синџир околу Палатата на правдата во Брисел, а белгиските медиуми јавија дека низ целата земја беа одржани повеќе од 50 протестни собири.
Групите за човекови права и адвокатите се спротивставуваат на законот. Тие тврдат дека влегувањето на полицијата во приватни домови за имиграциски проверки ги крши уставните права и законите за приватност.
Претресите ќе бидат ограничени на домовите на луѓе на кои им е одбиен азил во Белгија и кои не ја напуштиле Белгија, а е оценето дека претставуваат закана за јавната безбедност. Претресите ќе се вршат со одобрение од истражен судија во периодот од пет до девет часот, во присуство на службениците за имиграција.