23 пациенти на скопските клиники
Во моментов на скопските клиники се лекуваат 23 пациенти повредени во трагичниот настан во Кочани. Над 20 се испратени на домашно лекување, информираше денеска министерот за здравство Арбен Таравари.
Од хоспитализираните, четворица се на скопските клиники, двајца на Клиниките за пластична хирургија, двајца на токсикологија, во хируршкиот клинички центар „Св. Наум Охридски“ има шест пациенти, во „8 Септември“ девет, додека во приватната болница Систина има четворица. Сите се во стабилна состојба, нагласи министерот Таравари.
Четири пациенти се враќаат од Шпанија, еден од Грција
Додаде дека доаѓаат добри вести и од странските болници. Вчера, покрај тоа што од Србија се врати еден пациент, исто така вратена е и пациентка од Бугарија. Денес се враќаат уште пет пациенти, четворица од Шпанија и еден од Грција. Како што налага протоколот, во првите 24 часа тие ќе бидат сместени на скопските клиники, а со одлука на конзилиумот ќе може да бидат пуштени на домашно лекување.
Враќањата од странство продолжуваат и утре
Утре исто така се очекува враќање на уште четворица хоспитализирани пациенти во странство, за што министерот Таравари рече дека дополнително ќе информира. Нагласи дека трендот на пациенти кои се подготвени да се враќаат се зголемува, и тоа е добро.