Европскиот парламент усвои нов пакет правила со кои значително се зајакнуваат правата на авионските патници во Европската Унија. Реформата предвидува поголема транспарентност при продажбата на авионски билети, бесплатно седење на родителите до нивните деца и поедноставени процедури за добивање обесштетување во случај на доцнење или откажување на летови.
Предлогот доби силна поддршка од европратениците и сега треба формално да биде одобрен од земјите членки на ЕУ. По неговото стапување во сила, авиокомпаниите ќе имаат една година да ги усогласат своите политики.
Една од најзначајните новини е што семејствата повеќе нема да плаќаат дополнително за родителите да седат покрај своите деца. Со ова, Европската Унија сака да стави крај на практиката патниците да бидат разделувани во авионот доколку не платат за избор на седишта.
Новите правила предвидуваат и целосна транспарентност на цените. Авиопревозниците ќе мора однапред јасно да ги прикажат сите трошоци, вклучувајќи ги и оние за избор на седиште, багаж и други дополнителни услуги, за патниците уште при резервацијата да знаат колку навистина ќе ги чини патувањето.
Во однос на доцнењата, остануваат постојните правила за обесштетување. Патниците ќе имаат право на надомест доколку летот доцни три часа или повеќе по вина на авиокомпанијата. Надоместокот ќе изнесува 250 евра за летови до 1.500 километри, 400 евра за летови до 3.500 километри и 600 евра за подолги летови. Истото право ќе важи и за откажани летови доколку тие биле откажани помалку од две недели пред полетувањето.
Дополнително, авиокомпаниите ќе бидат обврзани активно да ги информираат патниците за нивните права. Најдоцна четири дена по пристигнувањето ќе треба да им достават информации за тоа како можат да побараат обесштетување, а по поднесеното барање ќе имаат рок од 30 дена да исплатат надомест или да го образложат евентуалното одбивање.
Право на компензација нема да има во случаи на вонредни околности, како природни катастрофи, сериозни безбедносни закани и други настани што се надвор од контролата на авиокомпанијата. Сепак, штрајковите на вработените во самата компанија и повеќето технички дефекти нема автоматски да се сметаат за оправдување за неплаќање обесштетување.
Европскиот парламент не го прифати предлогот за воведување единствени димензии за рачниот багаж, но авиокомпаниите ќе мора јасно да наведат дали рачниот багаж е вклучен во цената на билетот или се наплаќа дополнително.
Новите правила ќе важат за сите летови што ги извршуваат авиокомпании од Европската Унија, како и за летовите на странски превозници што полетуваат од аеродроми во земјите членки. Целта на реформата е патувањата да станат потранспарентни, пофер и да им обезбедат поголема заштита на патниците.