Забранет увоз и нештетно уништување
Инспекциските служби на Агенцијата за храна и ветеринарство (АХВ) открија и спречија увоз на 20.500 килограми замрзнат компир – помфрит, кој на 23 мај 2025 година веќе имал поминат рок на употреба. Компирот, увезен од Холандија, бил наменет за продажба на македонскиот пазар.
Забранетите количини, во присуство на инспектори за храна од АХВ, беа нештетно уништени на депонијата Дрисла, врз основа на изречената мерка за забрана на увоз и решението со наредба за нештетно уништување.
Дополнителна заплена и казни
Во рамки на вонреден инспекциски надзор кај оператор со храна од животинско потекло, АХВ заплени и нештетно уништи 2.000 килограми небезбеден пилешки стек.
Поради непочитување на процедурите на Добра хигиенска и Добра производствена пракса, на операторот му е изречена мерка за времен прекин на работа и парична казна од 4.400 евра во денарска противвредност.
Контроли за безбедност на храната
АХВ додава дека преку редовни и вонредни инспекциски контроли на официјални ветеринари и инспектори за храна продолжува со спроведување мерки за заштита на граѓаните од консумирање небезбедна храна, како и за заштита на здравјето и благосостојбата на животните.