Десетици италијански градови денеска се опфатени со генерален штрајк и протести против растот на животните трошоци и зголемувањето на воените расходи во Европа. Во организираните демонстрации учествуваат илјадници граѓани кои бараат социјална правда и пренасочување на буџетските средства кон потребите на населението.
Во протестите, што ги организира независниот синдикат УСБ под мотото „Да изгасиме сè“, земаат учество работници, студенти, пензионери, активисти за правото на домување и пристанишни работници од повеќе региони во земјата.
Италијанските власти ја следат состојбата со засилено внимание по неодамнешните насилни инциденти што се случија во Милано. Министерството за внатрешни работи изрази стравување дека одредени насилни групи би можеле да се приклучат на протестните поворки и да предизвикаат нереди што би продолжиле и во текот на претстојниот викенд.
Министерот за внатрешни работи Матео Пјантедози оцени дека безбедносната ситуација е проблематична. Тој најави воведување засилени полициски контроли и спроведување превентивни приведувања во согласност со новата уредба за безбедност, додека јавните сообраќајни услуги низ државата функционираат само делумно.
Во Рим протестната поворка тргна од железничката станица Термини во правец кон Царските форуми, при што безбедносните служби проценуваат учество на најмалку 20.000 луѓе. Долж целата маршрута се воведени строги мерки за обезбедување, бидејќи движењето минува низ историското градско јадро, во непосредна близина на државните институции, владините објекти и Колосеумот.
Во Милано истовремено се одвиваат две поворки, од кои едната ја предводат студентски организации, додека другата е координирана од синдикатите и пропалестинските активисти. Планирано е поворките да се спојат на улицата Корсо Буенос Аирес и да се упатат кон периферијата на градот каде што беа забележани претходните немири, а полицијата будно дејствува за да спречи евентуални блокади на клучните патни правци.
Слични протестни собири се одржуваат и на улиците во Торино, Болоња и Неапол. Во Џенова, пристанишните работници уште во раните утрински часови го блокираа пристанишниот простор со запалени гуми и чадни бомби, упатувајќи повик до колегите од цела Италија за солидарност со порака дека одбиваат да работат за воени цели, додека стотици граѓани организираа блокада и пред влезот на пристаништето во Трст.