Бројот на луѓе кои страдаат од глад останува драматично висок на глобално ниво, покажува најновиот извештај на Глобалната мрежа против кризи поврзани со храна (GNAFC). Минатата година околу 266 милиони луѓе во 47 земји биле погодени од акутна несигурност во снабдувањето со храна, при што 10 земји се несразмерно најтешко погодени, меѓу нив Авганистан, Судан и Јемен.
Според извештајот, акутната несигурност во снабдувањето со храна во последната деценија е двојно зголемена, а глобалното ниво на глад останува алармантно високо. Дополнително, минатата година првпат во историјата беше прогласен глад на две места – во делови од Појасот Газа и во делови од Судан.
Перспективите за оваа година се оценуваат како мрачни, бидејќи тековните конфликти, климатските промени и глобалната економска неизвесност веројатно ќе ја задржат кризата на критично ниво, а можно е и дополнително влошување. Ескалацијата на конфликтите на Блискиот Исток може дополнително да ја усложни состојбата во одредени региони, но засега е рано за прецизни проценки, наведува GNAFC.