Израелските воздухопловни сили соопштија дека денеска ја извршиле својата досега најголема воена операција во Иран со околу 200 борбени авиони.
Опсежните напади беа насочени кон иранските балистички ракетни фрлачи и системи за воздушна одбрана, соопшти израелската војска.
ИДФ наведува дека борбените авиони фрлиле стотици муниции врз околу 500 ирански воени цели во западен и централен Иран, речиси симултано, во утринските часови како дел од операцијата.
„Ова е најголемиот воздушен напад во историјата на израелските воздухопловни сили, извршен по детално планирање со висококвалитетни разузнавачки податоци, синхронизирајќи стотици авиони истовремено“, се вели во соопштението на војската.
ИДФ соопшти дека нападите врз иранските системи за воздушна одбрана „овозможија проширување на воздушната надмоќ над иранското небо и му зададоа тежок удар на централниот офанзивен капацитет на режимот – локациите за лансирање во западен Иран“.
Една од локациите што беше погодена во областа Табриз служела на иранската единица за балистички ракети, „и оттаму се планирало лансирање на десетици ракети кон Израел“, соопшти ИДФ. (МИА)