Тензиите меѓу Иран и САД дополнително се заоструваат, откако ирански безбедносен извор најави дека наскоро може да следи „невидена“ воена акција како одговор на, како што ја нарече, американската поморска блокада.
Според информациите објавени од „Press TV“, извор близок до безбедносните структури во Техеран оценил дека трпението на Иран е при крај. Доколку продолжат американските активности околу Ормускиот Теснец, реакцијата ќе биде неизбежна.
Иранските вооружени сили, кои дејствуваат под команда на штабот „Хатам ал-Анбија“, предупредуваат дека досегашната воздржаност била со цел да се остави простор за дипломатско решение.
Во изјавата се нагласува дека, според нив, САД повеќе не се соочуваат со „пасивен или предвидлив противник“, туку со земја која е подготвена да реагира на секој потег.
Изворот посочил дека досегашната пауза била можност за политичко решение и за намалување на тензиите, но предупредил дека, доколку условите на Техеран бидат игнорирани, одговорот ќе биде поинаков.
Во пораката се споменува и американскиот претседател Доналд Трамп, со оценка дека има можност да ја намали кризата, но дека продолжувањето на актуелната политика може да доведе до дополнителна ескалација.