Американскиот технолошки гигант NVIDIA започна независна истрага против сопствениот основач и извршен директор Јенсен Хуанг. На маса се сомневања дека странски разузнавачки служби се обиделе да му се приближат преку неговите деловни контакти.
Истрагата следува по предупредувањата на американските власти за неговата поврзаност со директорка на компанија од Сингапур, осомничена за шверц на напредни чипови за вештачка интелигенција во Кина.
Одлуката беше објавена во неделата, 8 ноември, јави Си-Ен-Ен.
Во центарот на сомневањата е Алис Хуанг, позната и како Хуанг Ле, која има раководна улога во сингапурската компанија за центри за податоци „Мегаспид“. Таа не е во роднинска врска со директорот на NVIDIA.
Американските истражители се сомневаат дека преку компанијата биле пренесувани напредни чипови на NVIDIA во Кина, со што можеби биле заобиколувани американските ограничувања за извоз на чувствителна технологија.
Истрагата ќе ја надгледува посебен комитет составен од независни членови на управниот одбор, со помош на надворешни правни експерти.
Од NVIDIA соопштија дека националната и економската безбедност на САД се меѓу нивните приоритети, бидејќи се тесно поврзани со интересите на компанијата и нејзините акционери.
Сепак, комитетот нагласи дека засега нема причина да се верува оти националната безбедност или деловните тајни на компанијата се загрозени.
Портпарол на NVIDIA потврди дека Хуанг продолжува непречено да ја извршува својата функција.
„Јенсен останува целосно посветен на водењето на компанијата и продолжува да работи како извршен директор без прекин“, изјави портпаролот.
Сомневањата за Алис Хуанг не се нови. Според претходните извештаи на „Њујорк тајмс“, на кои се повика и британскиот „Гардијан“, американските разузнавачки служби со години ја следеле поради можни врски со кинеското разузнавање.
Според неименувани извори запознаени со истрагата, американските истражители заклучиле дека таа работела за кинеските разузнавачки служби и му доставувала деловни информации на Пекинг.
Овие тврдења не се јавно потврдени со судска пресуда.
Посебна загриженост кај американските власти предизвикал нејзиниот пристап до Јенсен Хуанг, кој има блиски деловни контакти со администрацијата на американскиот претседател Доналд Трамп.
Вашингтон воведе ограничувања за извоз на најнапредните чипови за вештачка интелигенција во Кина, стравувајќи дека технологијата може да биде искористена за воени и разузнавачки цели.
Американските власти се сомневаат дека Алис Хуанг можела да помогне во заобиколувањето на овие ограничувања.
Компанијата претходно ги отфрли сомневањата дека контактите на нејзиниот директор со Алис Хуанг биле невообичаени.
Според NVIDIA, средбите со клиенти се редовен дел од работата на Јенсен Хуанг, а компаниите како „Мегаспид“ добиваат исклучиво вообичаени деловни информации.
Од технолошкиот гигант нагласија дека на таквите состаноци не се споделуваат доверливи податоци или информации важни за националната безбедност.
NVIDIA е еден од најважните светски производители на напредни чипови за вештачка интелигенција, а нејзините процесори се користат во најмоќните системи за обучување и работа на големите јазични модели.