Изложба на карикатури на Јордан Ѓорчев во штипската уметничка галерија „Галерија 22“

Јордан Ѓорчев, професор, писател, карикатурист, ерудит пред штипската публика ги изложи своите точно сто карикатури, од прва до последна инспирирани од нашето и светско време односно невреме. Карикатурите се изложени во уметничката „Галерија 22“ при Центарот за култура „Ацо Шопов“.

Директорот на Центарот за култура „Ацо Шопов“-Штип, Горан Трајков вели дека оваа изложба е само вовед во соработката со Институтот за култура и уметност при МСУ „Гаврило Романович Державин“.

-Денес сведочиме за прва изложба на карикатури на Јордан Ѓорчев, но овој културен настан е само вовед во договорената културна соработка помеѓу нашиот Центар за култура и Институтот за култура и уметност при МСУ „Гаврило Романович Державин“, за што во многу блиска иднина ќе потпишеме и договор. Со тоа значајно ќе го прошириме полето на културна соработка помеѓу двете соседни општини, вели Трајков.

Писателот Трајче Кацаров истакна дека Ѓорчев освен што е автор, писател, карикатурист, како личност во неговиот град Свети Николе на Славјанскиот универзитет обезбедува посебен простор за културата.

-Токму на МСУ „Гаврило Романович Державин“, благодарејќи на огромната посветеноста на Ѓорчев кон културата, се одржуваат голем број културни настани, како гостување на театри, писатели, поети, сатиричари, културно – уметнички друштва. Конечно, токму Ѓорчев е човекот кој прв на овие наши простори отвори 3Д кино, промовирајќи ја на тој начин и филмската култура како дел од севкупноста на културниот живот на секој човек, рече Кацаров.

Ѓорчев смета дека е потребна поголема соработка меѓу културните институции, за поактивна размена и соработка.

-Се надевам дека во иднина со најголемата културна институција во Источниот регион ќе бидеме поактивни во размената на културни добра, а институцијата со која јас раководам – Меѓународниот славјански универзитет „Гаврило Романович Державин“, а во која посебно места има и културата, секогаш е и ќе биде широко отворена за работниците во културата од Штип и за нивните остварувања, рече Ѓорчев.

Карикатурите на Ѓорчев може да ги видат до крајот на седмицата.