Израелскиот министер за одбрана Израел Кац изјави дека шефот на безбедносните структури на Иран, Али Лариџани, е убиен во израелски воздушен напад, додека сè уште нема официјална потврда за оваа информација од Техеран.
Лариџани се смета за еден од највлијателните ирански политичари и безбедносни службеници. За време на својата кариера, тој имал голем број клучни позиции, вклучувајќи ја и функцијата претседател на иранскиот парламент, а бил и советник на Врховниот лидер на Иран за стратешки прашања. Тој се сметал за близок до естаблишментот и важна фигура во донесувањето одлуки во областа на националната безбедност.
Да потсетиме, израелските власти претходно објавија дека во текот на ноќта бил извршен прецизен воздушен напад на иранска територија, а целта бил високиот ирански функционер Али Лариџани.
Во меѓувреме, друг неодамнешен израелски воздушен напад во Иран бил насочен кон лидерот на палестинскиот исламски џихад, Акрам ал-Аџури, и други високи функционери на оваа организација, според „Тајмс оф Израел“.
Началникот на Генералштабот на израелската армија, генерал-потполковник Ејал Замир, индиректно ги потврди овие тврдења. За време на неговата утринска проценка на ситуацијата, тој рече дека „значајни резултати од елиминацијата се забележани и преку ноќ, со потенцијал да влијаат на исходот од кампањата и мисијата на ИДФ“, што беше протолкувано како референца на нападот насочен кон Лариџани.
„Ова доаѓа покрај елиминациите извршени во последните денови во Иран против надворешни елементи, исто така поврзани со палестинската област“, рече Замир, алудирајќи на претставници на Исламски џихад.
Тој додаде дека „високи оперативци вклучени во терористички активности од Газа и Западниот Брег“ биле во безбедна куќа во Техеран во времето на нападот.