Во основното училиште „Св. Климент Охридски“ во Битола успешно завршија градежните работи за реконструкција на кровната конструкција. Проектот се реализираше со директна финансиска поддршка од Амбасадата на Јапонија во висина од 80.314 евра. Со оваа инвестиција значително се унапредуваат условите за престој и настава на учениците.
Донацијата овозможи санирање на оштетениот дел од покривот, со што директно се зголемува безбедноста на објектот и се создаваат поквалитетни просторни услови за непречено одвивање на воспитно-образовниот процес.
Од училишната управа посочуваат дека континуираната поддршка и вложувањата од Општина Битола, заедно со оваа значајна јапонска помош, претставуваат клучен чекор кон модернизација на образовната инфраструктура и трајна грижа за стандардот на децата и наставниот кадар.
На свечениот настан организиран по повод финализацијата на градежните зафати присуствуваше и заменик-градоначалничката на Битола, Марина Крстиќ, која ја истакна важноста на ваквите меѓународни партнерства за локалната заедница.