Украинскиот претседател Володимир Зеленски упати итен повик до западните сојузници за воведување решителни контрамерки против Москва. Реакцијата доаѓа по силниот руски напад со беспилотно летало врз железничката станица во градот Днепар, во кој животот го загубија најмалку 13 цивили.
Зеленски преку социјалните мрежи упати остри критики поради претходното ублажување на меѓународниот притисок врз Москва. Тој побара веднаш да се стави крај на какви било отстапки кон рускиот енергетски сектор и влијателните структури.
„Колку уште терористички напади треба да изврши Русија против нашиот народ откако беа укинати санкциите против некои руски олигарси и рускиот енергетски сектор? Потребна е одлучна и фер акција од Америка и Европа како одговор на руската ескалација. Санкциите против Москва и нејзината воена машинерија не смеат да се ублажат додека продолжува војната на Русија. Време е ЕУ, САД и Г7 да воведат нови, посилни санкции“, објави Зеленски.
Информациите од локалните власти потврдуваат дека рускиот дрон директно погодил еден од пероните на железничката станица. На тоа место во моментот бил поставен возот што сообраќа на релација меѓу Днепар и Запорожје, каде што имало концентрирано голема група патници. Точниот број на повредени граѓани сѐ уште официјално се утврдува од страна на спасувачките служби.