Малолетно момче се здоби со тешки телесни повреди откако било прегазено на скопската улица Славеј Планина. Инцидентот се случил во попладневните часови, по што повредениот пешак бил итно хоспитализиран. Полицијата изврши увид на местото на настанот.
Сообраќајната несреќа се случила околу 16 часот кога патничко возило „ауди“ со скопски регистарски таблички, управувано од 25-годишниот скопјанец со иницијали Б.С., удрило во малолетникот. По ударот, детето веднаш со возило на Итната медицинска помош било транспортирано во Ургентниот центар „Мајка Тереза“.
Дежурните лекари во болницата констатирале тешки телесни повреди. За целиот настан веднаш бил известен дежурен јавен обвинител, кој издал конкретни насоки за понатамошно постапување.
По наредба на обвинителот, возилото „ауди“ било привремено одземено поради сомнение за сторено кривично дело безобѕирно управување со моторно возило според Кривичниот законик. По целосното расчистување и документирање на случајот, против 25-годишниот возач ќе биде поднесена соодветна кривична пријава.