Претседателката Гордана Сиљановска Давкова денеска упати честитки до Доналд Трамп за неговиот избор за претседател на САД.
„Уверена сум дека во периодот што следува нашето стратешко партнерство ќе биде унапредено и збогатено и дека САД ќе помогнат во исполнувањето на македонските стратешки цели“, истакна Сиљановска Давкова.
Премиерот Мицкоски меѓу првите лидери упати честитки кон Трамп.
„Со нетрпение очекуваме натамошно продлабочување на нашето цврсто партнерство и соработка, особено во областите на безбедноста, економскиот развој и демократските реформи“, е упатената честитка од премиерот Мицкоски до новиот американски претседател.
Министерот и вицепремиер, Александар Николоски упати честитки кон Доналд Трамп.
Искрени честитки упатувам на Доналд Трамп, новиот претседател на Соединетите Американски Држави. Демократските вредности уште еднаш ја потврдија силната верба на американскиот народ за обезбедување на стабилна и просперитетна држава. Македонија и понатаму останува силен сојузник на САД и граѓаните, стратешки партнер во евроатланските процеси и промотор на глобалниот мир и поредок, рече министерот Николоски.
И министерот за надворешни работи, Тимчо Муцунски упати честитки.
Во честитката, објавена на социјалните мрежи, Муцунски вели дека со нетрпение очекува да работи со новата американска администрација, споменувајќи го притоа и Ричард Гренел, еден од најблиските соработници на Трамп и функционер за време неговиот прв мандат во Белата куќа.
„Честитки до претседателот Трамп за неговата изборна победа! Со нетрпение очекувам да работам со мојот добар пријател Ричард Гренел и со новата администрација на Трамп за да ја унапредиме нашата заедничка визија за глобален мир и просперитет“, напиша Муцунски во честитката.
И лидерот на опозицијата, Венко Филипче со честитка.
-Во мое име и во име на Социјалдемократскиот сојуз на Македонија, му ја честитам победата на изборите на Претседателот на САД, Доналд Трамп. Убеден сум дека под негово водство стратешкото партнерство меѓу САД и Северна Македонија ќе продолжи и ќе се продлабочи, вели Филипче во честитката.