Израелскиот премиер Бенјамин Нетанјаху го разреши министерот за одбрана Јоав Галант, потег кој ја вжешти политичката сцена во Израел. Галант неодамна побара итна државна истрага за нападот на Хамас од 7 октомври, истакнувајќи дека владата мора целосно да ги истражи неуспесите на безбедносните агенции, како и на премиерот лично. Овој повик доаѓа во момент кога владата е под силен притисок од јавноста за транспарентност и отчетност поради големите жртви и загуби.

Нетанјаху го назначи Израел Кац за нов министер за одбрана

Израел Кац, кој досега ја извршуваше функцијата министер за надворешни работи, е назначен за нов министер за одбрана, со што ќе го замени Галант. Новоназначениот министер за надворешни работи ќе биде Гидеон Саар, кој ќе го преземе местото на Кац. Промените во кабинетот се дел од пошироките турбуленции во коалициската влада на Нетанјаху, која веќе подолг период се соочува со внатрешни несогласувања.

Галант, при неговото обраќање на церемонијата за дипломирање на новите воени офицери, повика на истрага која ќе ја опфати целата влада и безбедносните служби, вклучувајќи го и самиот Нетанјаху.

  • „Државната истрага мора да биде објективна и да ги опфати сите нас, оние кои носат одлуки и оние кои ги извршуваат,“ нагласи Галант пред присутните, добивајќи поддршка и аплаузи.

Галант и Нетанјаху во конфликт поради прашањето на државната истрага

Оваа одлука на Нетанјаху не е прва контроверзна интервенција против Галант. Лани, во време на масовни протести поради владините планови за ограничување на моќта на врховниот суд, Галант јавно се спротивстави на легислативата. Тој предупреди дека јавните несогласувања и поделби можат да и наштетат на националната безбедност. Неговата позиција предизвика незадоволство во партијата Ликуд и дојде до отстранување на Галант од функцијата, но по масовни протести и јавна поддршка, Нетанјаху го врати Галант во кабинетот.

Истрага за нападот на Хамас – ново барање за отчетност

Поради нападот на 7 октомври, кој ги изненади израелските безбедносни агенции и поттикна нова воена акција во Газа, Галант бара јавноста да добие целосна слика за околностите и неуспесите на властите.

  • „Истражувањето треба да ме вклучи мене како министер за одбрана, и да го опфати самиот премиер.“, изјави Галант, нагласувајќи дека државната истрага треба да го покрие секој аспект на одлучувањето и извршувањето на задачите во врска со безбедноста.

Нетанјаху засега се спротивставува на формирањето на државна истражна комисија, наведувајќи дека било каква истрага треба да се спроведе само откако ќе заврши воената операција во Газа. Оваа комисија има широки овластувања и може да изнесе наоди кои ќе имаат голема тежина и влијание врз политичкиот живот во Израел. За именување на членовите на комисијата, одговорен е главниот судија на Врховниот суд.

Политичкиот удар и судирот во кабинетот

Односите меѓу Галант и Нетанјаху се затегнати со месеци, особено по несогласувањата околу стратегијата за Газа. Дел од членовите на партијата Ликуд отворено побараа Галант да биде разрешен, сметајќи дека неговите изјави ја нарушуваат политичката кохезија и ги изложуваат на ризик приоритетите на националната безбедност. Со овој последен потег, Нетанјаху направи нова рокада во својата влада, обидувајќи се да ги консолидира политичките сили во време на големи безбедносни предизвици и јавен притисок.