Фондот за здравствено осигурување е институција која не е само администратор на фондови туку партнер, градител, чувар на стабилноста и двигател на реформите. Мораме да бидеме искрени, оваа институција во минатото имаше сериозно разнишан кредибилитет, граѓаните гледаа поединци со пари, директори, непресметани расходи, нетранспарентни одлуки и систем кој повеќе личеше на поле за лични привилегии отколку на сервис на граѓаните, истакна премиерот Христијан Мицкоски на денешниот настан на кој се одбележуваат 25 години од осамостојувањето на ФЗО.
-Полека, но сигурно, споредено со минатото, ФЗО го враќа својот интегритет и единствениот начин тоа да се поврати е бескомпромисна борба против криминалот и корупцијата, со работа, со ред, со дисциплина и со јасна одговорност. Морам да му честитам на директорот дека врши одлична работа, рече Мицкоски.
Премиерот посочи дека кога ја презеле одговорноста за водење на државата, затекнале здравствен систем во незавидна состојба со дефицит на кадар, нефункционални установи, недоволна опрема, долги листи на чекање и сериозно нарушена доверба кај пациентите.
-Наместо тоа да биде изговор се обидовме да преземеме акција. Во изминатата година и половина, Владата покажа посветеност кон јавното здравство. Од првиот ден тргнавме со јасна цел да го обновиме, модернизираме и хуманизираме здравствениот систем. Во инфраструктурата започнавме нов бран на инвестиции, од новата амбуланта во Петровец, до реконструкција и модернизација на операционите сали во 8-ми Септември, како и низа реконструкции, технолошки обнови на болници ширум државата, рече Мицкоски.
Оцени дека ова не се само градби – ова се домови на здравјето, места каде секој граѓанин има право на достоинствен и современ третман.
-Но објектите без здравствени работници се само празни објекти. Затоа ја водиме најсилната кадровска политика во последната деценија. Во изминатиот период 1.500 договорци добија можност да преминат на сигурни работни места. Имаме 600 нови специјализанти, од кои 300 веќе се вработени. И потпишавме долгорочен договор за раст на платите во јавното здравство секоја година до 2028 година. Ова не е трошок – ова е инвестиција во срцето на здравството, во луѓето. Дополнително, Владата обезбеди историски најголем буџет за ФЗО до сега – 53 милијарди денари. Тоа овозможи 33% зголемување на капитацијата за општите лекари и гинеколозите, 23% зголемување за стоматолозите, 17% кумулативен раст на платите во јавното здравство од кои 9.5% е реален раст, и 107% зголемување на условениот надоместок за нови иновативни лекови. Ова не се бројки на хартија. Ова се бројки што ја менуваат реалноста на пациентите, на здравствените работници и на целиот систем. Дел од нашата визија за модерно здравство е и бескомпромисната борба со криминалот и корупцијата. За првпат видовме обвиненија за тешки злоупотреби во онкологијата – области кои со години остануваа недопрени. Се истражува секоја злоупотреба, без исклучок, а ниту една установа или позиција не е заштитена ако ја нарушила довербата на пациентите. Таму каде што се работи за човечки животи – мора да има правда, истакна премиерот.
Денес, 25 години по основањето на Фондот за здравствено осигурување, гледаме институција што влегува во нова фаза.
-Веќе се подготвуваат нови проекти, нови објекти и нови стандарди кои ќе го кренат здравството на европско ниво. Ова не е крај, ова е почеток на ново поглавје. Ви честитам за овој јубилеј. Ви благодарам за трудот, за посветеноста, за сите тивки херојства кои не се гледаат, но секојдневно ги чувствуваме. Да продолжиме заедно – со истата вера, истата дисциплина и истата цел, да изградиме здрав, стабилен и современ систем кој ќе го штити секој наш граѓанин, посочи Мицкоски.