Основното јавно обвинителство Кавадарци поднесе обвиненија против три лица поради сериозни закани и онлајн говор на омраза насочени кон градоначалникот на Кавадарци и неговото семејство. Првообвинетиот се товари за кривично дело загрозување на сигурноста и за продолжено ширење расистички и ксенофобичен материјал по пат на компјутерски систем, додека другите двајца се обвинети за учество во пренесување закани и повици за насилство.
Според обвинението, првообвинетиот – 32-годишен маж со македонско и бугарско државјанство – подолг период на својот профил на Фејсбук објавувал содржини со говор на омраза, навреди и директни повици за насилство кон градоначалникот на Кавадарци. Тој споделувал и фотографии од оштетениот и неговите малолетни деца, проследени со сериозни закани. Како дополнителна демонстрација на намерата, објавувал видеа во кои пука со автоматска пушка и пиштол.
Од јули годинава, заканите продолжиле и преку телефонска апликација – со повици и пораки упатени лично до градоначалникот, во кои се заканувал и по животот на членовите на неговото семејство.
Според обвинителството, второобвинетиот телефонски пренесувал дел од пораките и заканите во име на првиот обвинет, додека третиот обвинет коментирал на неговите Фејсбук-објави, дополнително упатувајќи закани за убиство на градоначалникот.
Јавниот обвинител предложи притвор за првообвинетиот, оценувајќи дека постои реален ризик од бегство, како и опасност да го изврши делото со кое се заканува. Предлогот е доставен до судијата за претходна постапка во Основниот суд Кавадарци.