Потврда на стратешко партнерство и пријателски односи
Во рамки на официјалната работна посета на Вашингтон, министерот за надворешни работи и надворешна трговија, Тимчо Муцунски, оствари средба со помошникот државен секретар на САД за Европа и Евроазија, Андрју Стоу. На состанокот се разгледаа постигнувањата во изминатите 30 години од воспоставувањето дипломатски односи меѓу Република Македонија и Соединетите Американски Држави, како и можностите за понатамошно продлабочување на соработката.
Соговорниците нагласија дека билатералните односи се засновани на заеднички вредности, меѓу кои безбедноста, демократијата и слободата, и дека стратешкото партнерство продолжува да биде стабилно и конструктивно.
На средбата се дискутираше и за активното сојузништво во рамки на НАТО, како и за заедничкиот придонес кон регионалната и глобалната стабилност. Притоа, беше истакнато дека Македонија и САД продолжуваат да соработуваат во мултилатералните организации, со цел унапредување на безбедноста и демократските процеси во регионот.
Разговорите се однесуваа и на потенцијалот за понатамошно унапредување на политичката и секторската соработка. Муцунски ја оцени континуираната поддршка на САД во зајакнувањето на капацитетите и спроведувањето на неопходните реформи како значајна за македонската трансформација.