Средби со државниот врв и потпишување билатерални документи
Министерот за надворешни работи и надворешна трговија Тимчо Муцунски од денеска престојува во дводневна официјална посета на Државата Катар.
Како што соопшти Министерството за надворешни работи и надворешна трговија, за време на посетата се предвидени средби со највисоките катарски претставници, меѓу кои премиерот и министер за надворешни работи, заменик-премиерот и државен министер за одбрана, како и државниот министер за надворешни работи.
Во рамки на посетата е планирано и потпишување на повеќе билатерални документи.
Средби со инвестициски фондови и компании
Покрај политичките разговори, Муцунски ќе има средби и со претставници на повеќе инвестициски фондови и катарски компании.
Од Министерството наведуваат дека посетата има цел да придонесе за унапредување на економската соработка и отворање нови можности за инвестиции.
Фокус на продлабочување на билатералните односи
Од МНРиНТ очекуваат посетата да ја потврди подготвеноста на двете земји за понатамошно зајакнување на меѓусебните односи.
Според Министерството, Македонија и Катар имаат заеднички интерес за продлабочување на соработката во повеќе области од заемен интерес.