Фадиљ Пушкољи, припадник на поранешната ОВК, синоќа беше уапсен на граничниот премин Блаце, врз основа на српска потерница, објави Танјуг.
Пушкољи, кој е сопственик на косовскиот медиум „Косова пост“, на својот профил на Фејсбук објави дека е уапсен и побара помош од косовските власти. Според него, тој е уапсен „поради неговото членство во ОВК“. Подоцна вечерта тој напиша дека, откако полицијата извршила со него разговор и испрашување, бил пуштен.
Пушколи во вечерашната објава ѝ се заблагодарува на македонската полиција и посебно на Албанците во нејзините редови.
„По разговорот и испрашувањето, бев ослободен од полицијата на Северна Македонија. Сакам да ѝ се заблагодарам на полицијата на Северна Македонија, особено на полицајците Албанци, за коректноста, почитта и доброто однесување во текот на целата постапка. Ви благодарам за коректноста и професионалноста!“, напиша тој.
Официјално нема достапни информации кои би потврдиле дека Пушколи е баран од Србија, како што првично беше објавено. Македонските институции досега не соопштија ништо за вечерашното приведување на косовскиот сопственик на медиум.