Европската унија постигна политички договор за 21. пакет санкции против Русија, со нови ограничувања насочени кон енергетскиот сектор, финансиските институции и компаниите поврзани со руската воена индустрија.
Амбасадорите на земјите членки на ЕУ договорија нови мерки кои треба дополнително да ги ограничат приходите на Москва од продажбата на енергенси. Формалното усвојување на пакетот се очекува по завршување на писмената процедура.
Меѓу најважните мерки е продолжувањето на ограничувањето на максималната цена на руската нафта на 44,10 долари за барел во следните 12 месеци. Европските власти сметаат дека ова ќе го намали финансискиот капацитет на Русија за финансирање на воените активности.
Новиот пакет предвидува и дополнителни санкции против руски банки, платформи поврзани со трговија со криптовалути и компании кои помагаат во заобиколување на постојните ограничувања. На листата на санкционирани субјекти се додадени и нови бродови од таканаречената „флота во сенка“, која Москва ја користи за транспорт на нафта надвор од традиционалните канали.
Претседателката на Европската комисија, Урсула фон дер Лајен, изјави дека новите санкции ќе продолжат да ги ослабуваат економските темели на руските воени напори. Таа нагласи дека ЕУ за првпат презема мерки и против пловила кои ја поддржуваат руската „флота во сенка“.
Во договорот е вклучен и ограничен исклучок за транспорт на руски течен природен гас кон трети земји, но само за договори потпишани пред почетокот на руската инвазија врз Украина во февруари 2022 година.