Осум од најголемите светски нафтени компании оствариле вкупен профит од речиси 93 милијарди долари во трите месеци до крајот на јуни, откако војната со Иран предизвикала силен раст на глобалните цени на енергијата.
Според анализата на „Гардијан“, станува збор за првиот целосен финансиски квартал по почетокот на американско-израелската војна против Иран, во кој цената на нафтата достигнала повеќе од 126 долари за барел.
Компаниите речиси ги удвоиле своите заеднички профити во споредба со истиот период минатата година, кога заработиле нешто помалку од 50 милијарди долари.
Над 700.000 долари профит секоја минута
Меѓу компаниите опфатени со анализата се „Арамко“, БП, „Шел“, „Еквинор“, „ТоталЕнерџис“, „Ени“, „Шеврон“ и „ЕксонМобил“. Податоците покажуваат дека тие во текот на пролетниот квартал заработувале повеќе од 700.000 долари секоја минута.
Најголем профит остварила саудиската државна компанија „Арамко“, чиј квартален нето-приход се зголемил за 34 отсто и надминал 33 милијарди долари.
БП, пак, пријавила квартална добивка од 5,73 милијарди долари, што е повеќе од двојно во споредба со 2,5 милијарди долари во претходните три месеци.
Пазарната вредност на осумте компании во истиот период се зголемила за околу 600 милијарди долари и надминала три билиони долари.
Нови повици за одговорност на компаниите
Големите профити повторно ги поттикнаа повиците нафтените и гасните компании да учествуваат во покривањето на еколошката штета и да обезбедат средства за побрза транзиција кон обновливи извори на енергија.
Активистите предупредуваат дека нарушувањата на енергетскиот пазар им носат огромни заработки на компаниите, додека милиони домаќинства се соочуваат со повисоки сметки.
Американскиот претседател Доналд Трамп, исто така, ги критикуваше профитите на нафтените компании, оценувајќи дека тие заработуваат премногу поради недостигот на глобалниот пазар.
Цената на суровата нафта „брент“ пред нападите изнесувала околу 70 долари за барел, до крајот на април достигнала 126 долари, а потоа се стабилизирала на околу 85 долари.