Ајнтрахт Франкфурт е клубот чии фудбалери забележале најголем раст на вредноста во последните пет години, покажува најновата анализа на Меѓународниот центар за спортски истражувања (ЦИЕС). Германскиот клуб се искачи на самиот врв на европското рангирање со вкупен позитивен биланс од 527 милиони евра.
Од оваа импресивна сума, 293 милиони евра се однесуваат на зголемената вредност на фудбалерите кои во меѓувреме направиле трансфери и го напуштиле клубот, додека преостанатите 234 милиони евра претставуваат проценет раст на вредноста на играчите кои сè уште активно настапуваат во составот.
На второто место на листата се наоѓа шпанскиот гигант Реал Мадрид со биланс од 526 милиони евра, што е само еден милион помалку од германскиот лидер. Зад нив следуваат Пари Сен Жермен со 490 милиони, Бенфика со 488 милиони и Манчестер сити со позитивни 447 милиони евра. Во елитното друштво на најдобрите десет тимови според оваа методологија влегоа уште и екипите на Штутгарт, Виљареал, РБ Лајпциг, Унион Сен Жилоа и Аталанта.
Методологијата на анализата директно ги споредува вкупните трансферни суми платени при ангажманот на играчите со приходите остварени од нивната подоцнежна продажба, односно со нивната актуелна пазарна проценка доколку сè уште се дел од тимот.