Претседателот на Република Српска, Милорад Додик, нема да поднесе жалба на пресудата со која е осуден на една година затвор и шестгодишна забрана за вршење политичка функција. Тој истакна дека Народното собрание на Република Српска го отфрли случајот против него пред Судот на БиХ, оценувајќи дека процесот е политички мотивиран.
„Лично нема да се жалам, ниту ќе учествувам во овој процес. Ако адвокатите одлучат нешто од правни причини, тоа е нивна одлука, но јас ќе бидам против тоа“, изјави Додик.
Одлуките на Народното собрание – одбрана на Дејтонскиот договор
Според Додик, одлуките на Народното собрание на РС претставуваат обид за враќање на Република Српска кон основните принципи на Дејтонскиот мировен договор.
„Она што денес го гледаме е демонстрација на груба сила од меѓународниот фактор и ароганцијата на муслиманите од Сараево“, рече тој.
Тој повтори дека Дејтонскиот мировен договор не се почитува, а Република Српска бара враќање кон неговата оригинална верзија.
„БиХ нема сопствен територијален интегритет, тој ѝ припаѓа на ентитетите што ја сочинуваат државата. Според Уставот на БиХ, земјата се состои од два ентитета и три конститутивни народи“, нагласи Додик.
Милорад Додик: Злоупотреба на судските институции
Додик оцени дека Судот и Обвинителството на БиХ ја злоупотребиле својата улога, што, според него, е резултат на интервенциите на високиот претставник Кристијан Шмит.
„Дали овие институции го злоупотребиле своето постоење? Апсолутно. Го правеле тоа во минатото, ќе го прават и во иднина. Нека тужат кого сакаат, тоа не ме загрижува“, порача тој.
Тој додаде дека нема страв од никакви последици и најави дека Шмит ќе биде отстранет од регионот.
Повик за разговори со Федерацијата на БиХ
Претседателот на РС објави дека, заедно со премиерот Радован Вишковиќ, ги поканиле претседателката на Федерацијата на БиХ, Лидија Брадара, и премиерот Нермин Никшиќ на состанок во Бања Лука. Целта на средбата е разговор за имплементацијата на Дејтонскиот мировен договор.
„Подготвени сме да разговараме во термин кој ним им одговара“, заклучи Додик.