Љубителите на совршено уредениот дом постојано пронаоѓаат алтернативни методи за одржување на просторот беспрекорно чист. Меѓу најновите совети што привлекоа внимание на специјализираните портали е употребата на обична, неароматизирана вотка за отстранување на непријатните мириси во спалната соба.
Методот, кој беше претставен на британскиот портал „Ideal Home“, вклучува турање на пијалакот во шише со распрскувач и нанесување исклучително лесна магла врз површината на душекот. Целта не е ткаенината да се натопи, туку брзо да се испрска, по што душекот треба целосно да се исуши на воздух, а просторијата темелно да се проветри пред повторното местење на чаршафите.
Застапниците на овој трик објаснуваат дека алкохолот помага во намалувањето на одредени површински микроорганизми и за разлика од комерцијалните спрејови, не остава тежок мирис по испарувањето. Неароматизираната вотка е практична затоа што нема вештачки бои и шеќери кои би можеле да направат лепливи дамки на текстилот. Иако душекот секоја ноќ апсорбира влага и телесна пот поради што со тек на време добива застарен мирис, стручњаците предупредуваат дека алкохолот не е целосна замена за длабинско перење и редовна хигиена.
Како опција во советот се наведува и додавање неколку капки етерично масло од лаванда или еукалиптус, но притоа се советува претпазливост бидејќи овие масла можат да предизвикаат иритации кај чувствителните лица или да остават траги на ткаенината. Исто така, не постојат научни докази дека прскањето со вотка целосно ги елиминира грините и бактериите со оглед на тоа што алкохолот брзо испарува.
Дополнително, бидејќи алкохолните испарувања се запаливи, процесот бара максимално внимание: во собата не смее да има отворен оган, запалени свеќи или грејни тела додека креветот целосно не се исуши. Проветрувањето, редовното перење на постелнината и чистењето според фабричките упатства остануваат најбезбедните чекори за чистота.