Кинески медицински тим изведе пионерска, минимално инвазивна процедура со која успешно намали голем тумор на белите дробови кај фетус, користејќи микробранова енергија наместо класична хируршка операција.
Интервенцијата била извршена врз 40-годишна бремена жена во 22. гестациска недела, кај чие бебе била дијагностицирана конгенитална пулмонална малформација (ЦПАМ). Станува збор за абнормално ткиво во белите дробови кое во овој случај достигнало големина од пет сантиметри, создавајќи опасен притисок врз срцето и предизвикувајќи наталожување течност во стомакот на фетусот.
За да го избегнат високиот ризик од отворена фетална операција – при која матката мора хируршки да се отвори – лекарите примениле иновативен пристап. Преку стомакот на мајката била внесена тенка игла директно до туморот, по што преку неа била испорачана микробранова енергија која го загреала и уништила зафатенот ткиво.
Резултатот бил видлив по само три дена: туморот драстично се намалил, а наталожената течност во стомакот на бебето целосно исчезнала. По успешниот третман, бременоста продолжила без компликации и бебето било родено во 37. гестациска недела со царски рез, со здрава тежина од 2,9 килограми.
Медицинските стручњаци го оценуваат случајот како важен чекор напред, со оглед на тоа што ова е прва регистрирана примена на микробранова аблација за лекување на ЦПАМ кај фетус. Иако се потребни дополнителни клинички испитувања за да се потврди општата безбедност на методот, процедурата отвора можност за значително побезбеден третман на тешките случаи без ризик од предвремено породување.