Невремето што ја зафати Словенија во средата попладне пред да удри во Хрватска, однесе еден живот во Блед, јави словенечката полиција, а пренесе агенцијата СТА.
Едно лице загина во Блед од паѓање на дрво, а друго е повредено. Две лица се повредени во удар на гром во кампот кај Мозирје на северот на Словенија.
Голема материјална штета е забележана низ целата земја, јавува агенцијата СТА. Град со големина на тениско топче падна во близина на Метлика, а илјадници луѓе останаа без струја, иако извештаите од електростопанството укажуваат дека прекините на струјата главно биле привремени.
Пожарникарите интервенирале во блискиот камп Менина, каде дрво паднало врз два шатори и автомобил, но за среќа нема повредени.
Пожарникарите од околу 300 противпожарни служби отстрануваат паднати дрвја, електрични и телекомуникациски столбови, покриваат отворени покриви, испумпуваат вода од поплавените згради и патишта и учествуваат во евакуацијата на граѓаните од загрозените подрачја.
Во Љубљана ветерот го откорнал металниот покрив на стадионот на Плечник, а во Целје од фудбалскиот стадион.
Ова е второ силно невреме што ја зафати Словенија за помалку од 24 часа.