НОВА АПЛИКАЦИЈА ЗА 112: Ќе испраќа локација, фотографии и видео во итни случаи

ЦУК најавува нова алатка за итни ситуации

Директорот на Центарот за управување со кризи најави дека наскоро граѓаните ќе можат да ја користат новата апликација „Where Are You“, наменета за побрза и поефикасна комуникација со службата 112 во итни ситуации.

Апликацијата треба да овозможи полесно и попрецизно пренесување на информации до надлежните служби, особено во моменти кога секоја секунда е важна.

Испраќање локација, фотографии и видеоснимки

Со новата апликација, корисниците ќе можат прецизно да ја испратат својата локација, како и фотографии и видеоснимки од местото на настанот.

Предвидена е и можност за директна видеокомуникација со Оперативниот центар, што треба да помогне службите побрзо да добијат јасна слика за состојбата на терен.

„Silent Call“ за тивко барање помош

Дополнително, ќе биде воведена и функцијата „Silent Call“, која ќе им овозможи на жртвите на семејно насилство и на лицата што се наоѓаат во опасност тивко и безбедно да побараат помош, без потреба да зборуваат.

Од ЦУК посочуваат дека со овие нови функционалности продолжува модернизацијата на системот 112, со цел поголема безбедност за граѓаните, попрецизно пренесување на информациите и поефикасна реакција на надлежните служби во итни ситуации.