Министерот за здравство, Сашо Клековски, денеска оствари работна посета на Општата болница во Кочани по повод донацијата од „Polish Aid“, обезбедена преку Амбасадата на Република Полска. Посетата беше искористена за увид во новите капацитети и разговори за идните инвестиции во здравствениот сектор во овој регион.
Станува збор за современа медицинска опрема наменета за потребите на оперативната сала, чија вкупна вредност изнесува 47 илјади евра. Донацијата опфаќа најсовремен операционен стол, компатибилен хистероскоп, операционо светло и друга неопходна хируршка опрема за вршење сложени интервенции.
Од болничката управа информираат дека со ставањето во функција на новата апаратура, уште во текот на вчерашниот ден биле успешно извршени три хируршки операции врз пациенти.
Покрај оваа странска донација, во болницата во Кочани се спроведуваат и низа други активности со цел унапредување на здравствената инфраструктура. Набавен е нов дигитален рендген-апарат кој треба наскоро да биде инсталиран, а одделот за физикална терапија е целосно опремен со современи медицински помагала.
На гинеколошко-акушерскиот оддел, со ангажманот на нови гинеколози, веќе е регистриран значителен раст на бројот на породувања. Воедно, службата за итна медицинска помош доби засилување со две нови амбулантни возила за побрз транспорт на пациентите.
„Модернизацијата на ОБ Кочани ќе ја анализираме заедно со Клиничката болница Штип. Источниот регион треба да се планира како целина – што се развива во Кочани, што во Штип и како двете болници меѓусебно се надополнуваат, наместо да се планира болница по болница“, истакна Клековски.
Министерот упати благодарност до полската програма за помош и дипломатското претставништво на Полска, како и до Општина Кочани и медицинскиот персонал на болницата за заложбите за подобра здравствена заштита.
