Американските здравствени власти предупредуваат на ширењето на опасна мешавина од фентанил и ветеринарниот седатив ксилазин, позната како „транк“, која предизвикува тешки рани, некроза и зголемен ризик од смртно предозирање.
Ксилазинот не е одобрен за употреба кај луѓе, но сè почесто се додава во нелегалниот фентанил за да го продолжи неговото дејство. Голем дел од корисниците, според американските власти, воопшто не знаат дека ја внесуваат оваа супстанција.
Американската Агенција за борба против дрога соопшти дека комбинацијата била пронајдена во заплени во 48 од 50 сојузни држави. Податоците од 2022 година покажале дека речиси една четвртина од запленетиот фентанил во прав содржел и ксилазин.
Една од најтешките последици се длабоките рани што настануваат поради стеснување на крвните садови и недоволен доток на кислород до ткивата. Раните можат да се претворат во чиреви, да предизвикаат изумирање на кожата и поткожното ткиво и да доведат до сериозни инфекции.
Тие не се појавуваат само на местото на инјектирање, туку и на други делови од телото, вклучително и кај лица што дрогата ја пушат или шмркаат. Во најтешките случаи, лекарите се принудени да извршат ампутација за да го спречат ширењето на инфекцијата и да го спасат животот на пациентот.
Комбинацијата е особено опасна затоа што и фентанилот и ксилазинот го забавуваат дишењето, срцевиот ритам и го намалуваат крвниот притисок. Налоксонот, лек што се користи при предозирање со опиоиди, делува врз фентанилот, но не го поништува дејството на ксилазинот.
Поради тоа, при предозирање често се потребни повеќе дози налоксон, вештачко дишење и итна медицинска интервенција. Здравствените експерти предупредуваат дека ксилазинот дополнително ја продлабочува опиоидната криза во САД и го зголемува бројот на тешки повреди и смртни случаи.