Претседателот на Здружението на домови за стари лица на Србија, Радослав Миловановиќ и неговото семејство, кои пред шест дена заминаа на одмор во Сивири на Халкидики за српски „Курир“ ги открија деталите за немилиот настан што ги снашол за време на летувањето.

-Возам ново БМВ, кое привлекува големо внимание кај минувачите, па нè препознаа како добар улов. Провалиле во текот на ноќта и ни украдоа неколку илјади евра, лаптоп, рачен часовник, а мене уште не ми се верува што ни се случи, раскажува тој.

Објаснува дека иако има лесен сон и се будел неколку пати во текот на ноќта, не слушнал кога крадците се „прошетале“ по нивната куќа.

-Ја оставивме вратата на балконот на кипење. Станав рано со намера да одам на плажа пред да се разбудат децата, а кога го побарав лаптопот што беше оставен на масата, видов дека го нема. Сопругата ми рече дека не го земала. Веднаш сфатив дека некој влегол во станот додека спиевме, вели Радослав.

Веднаш ја побарал чантата во која ги чува пасошите и сите други документи, но неа ја немало.

-Ја оставив на приземје. Сепак, ја забележав на терасата, и тоа во ранецот на жена ми, замислете. Земале сè, извадиле на тераса, истресле што имало и земале што им одговарало, дури и го земале клучот од колата и отишле да видат што има во неa, но бидејќи ништо не нашле, уредно го ставиле клучот назад во чантата до празниот паричник. Не ги допиреа картичките, мобилните телефони, дури ни таблетите, бидејќи знаат дека на овој начин полицијата може полесно да ги лоцира. Ми го земаа и рачниот часовник. Ги тријам очите и не ми се верува што гледам. Истрчав надвор да видам дали автомобилот е таму. Гледам дека е, но е отклучен и ретровизорите се поместени, вели Радослав.

Миловановиќ вели дека најмногу жали за компјутерот на неговата сопруга во кој имало многу доверливи податоци.

-Работи како социјален работник, таму имаше многу документи, не знам што ќе биде со нив. Едноставно не ми се верува дека ништо не сум слушнал, а можеби е и подобро, бидејќи не знам како ќе реагирав. Сигурно ги имало два-тројца бидејќи се беше совршено организирано, додава Радослав.

Според него, разбојниците се добро координирана група која со недели оперира низ Грција.

-Ограбиле Бугарин. Му го зеле автомобилот. Соседите велат дека го виделе крадецот како седи во автомобилот и чепка нешто, но не им паднало на памет дека е крадец. На една жена и влегле во станот. Типот кој стоел над нејзината глава кога се разбудила, ѝ направил знак да молчи, ѝ ја украл чантата и си заминал. Убеден сум дека се работи за организирана албанска група. Крадците дури го исклучиле и рефлекторот пред куќата. Секоја вечер го паркирав автомобилот таму, светеше, но сега не, вели Радослав.

Миловановиќ веднаш ја известил полицијата која во станот пристигнала два часа подоцна, додека вештачењето дошло следниот ден.

-Ни кажаа дека во последно време се пријавени неколку случаи, дека ова место е на удар, бидејќи е мирно и не е големо. Наводно, им влегле во траг на разбојниците, дури имаат и опис на еден од нив, бидејќи сличен грабеж се случил во хотел. Познато е дека возат црн „голф“. Седум дена сме уште на одмор, го продолживме одморот како ништо да не било. На сите им советувам кога избираат стан да одберат место со видео надзор, паркинг и сеф. Верувајте дека се се случува, вели Радослав.