Министерот за животна средина и просторно планирање, Муамет Хоџа, присуствуваше на свеченото отворање на Светскиот лидерски самит „Кон одржлива, отпорна и правична иднина“ што се одржува во турскиот град Анталија. Хоџа е дел од официјалната државна делегација предводена од претседателката Гордана Сиљановска-Давкова, а домаќин на овој глобален настан е турскиот претседател Реџеп Таип Ердоган.
Свечената церемонија го означи почетокот на самитот на високо ниво наменет за шефовите на држави и влади во рамките на глобалната конференција COP31. Настанот претставува клучна меѓународна платформа за усогласување на глобалните стратегии за заштита на животната средина и справување со климатските предизвици.
Во рамки на пленарната сесија, свое обраќање пред присутните светски лидери имаше претседателката Сиљановска-Давкова. Таа детално ги претстави македонските позиции, климатските амбиции и целосната посветеност кон исполнување на меѓународните зелени цели.
Официјалното учество на делегацијата на овој форум го потврдува континуираниот придонес на земјата во меѓународниот климатски дијалог. Главниот фокус на националните заложби останува насочен кон спроведување праведна зелена транзиција, постигнување одржлив економски развој и јакнење на регионалната и глобалната соработка во еколошкиот сектор.