Пациентите со цистична фиброза ќе одржат протест на 3 мај пред Министерството за финансии, ако не добијат одговор од надлежните институции, до каде е работата со набавката на „трикафта“ за сите на коишто им е неопходна и со законските измени за побрза набавка на лекот, претседателот на Асоцијацијата за цистична фиброза, Фики Гаспар. Од Министерството за здравство, пак, велат дека веќе се во фаза на преговори за обезбедување дополнителни средства за набавка на дополнителни количини од лекот „трикафта“.
Заменик-министерката Маја Манолева соопшти дека е од голема важност што во рамки на Министерството за здравство се формираше работна група која ќе ги дефинира сите критериуми за вклучување на пациентите за лекување со лекот од кој што имаат потреба, не само „трикафта, туку и за други лекови.
Претседателот на Асоцијацијата вели дека, доколку нема јасни насоки што се случува, тогаш останува работата да се оди на протест пред Министерството за финансии, бидејќи сметат дека ако се обезбеди буџет, работите ќе се одвиваат многу побрзо.
Неофицијално, како што додаде Гаспар, наводно вчера на Влада поминало, уште 18 пациенти да добијат лек.
Тоа е за поздравување, но, ние апелираме дека го бараме за сите пациенти. За да нема несигурност и страв кај пациентите. Ако е точно, ќе има страв дали се во таа бројка, кога ќе дојде за нив. Утре мислам дека ќе има состанок во Министерството за здравство, сѐ уште чекаме да биде поканет наш претставник, подвлече Гаспар.
Тој кажа дека мисли оти е за 80 пациенти соодветен лекот.
Заменик-министерката за здравство вели дека сите поенти се во финална фаза на дефинирање, а во фаза на преговори се Министерството со Фондот за здравствено осигурување и Владата за обезбедување на дополнителни средства за набавка на дополнителни количини на лекот „трикафта“, којшто во моментов им е потребен на една група на пациенти со цистична фиброза
Во моментов, „трикафта“ примаат 12 лица.