Ако минатото лето се памети по екстремни горештини, прогнозите за 2026 година најавуваат уште потежок период. Според долгорочните анализи на метеоролозите, Македонија ја очекува лето со значително повисоки температури од просекот и зачестени топлотни бранови со влијание од Африка.
Во делови од земјата, особено во централните и југоисточните региони, температурите често ќе надминуваат 40 степени Целзиусови. Овие вредности, предупредуваат експертите, нема да бидат изолирани случаи, туку повторлива појава во текот на летните месеци.
Дополнителен проблем ќе бидат и т.н. тропски ноќи, кога температурите не се спуштаат под 20 степени. Ваквите услови значително го отежнуваат одморот и закрепнувањето на организмот, особено кај ранливите категории граѓани.
Како главен фактор за ваквите услови се посочува климатскиот феномен Ел Нињо, чие влијание се очекува да биде изразено во текот на летото. Тој придонесува за зголемени температури низ Европа, вклучително и на Балканот.
Покрај екстремната топлина, метеоролозите предупредуваат и на зголемен ризик од силни невремиња. Во Европа и регионот се очекува почеста појава на суперќелиски бури — најинтензивен тип на грмежни системи, проследени со силен ветер, крупен град и обилни врнежи. Вакви појави повремено се можни и во Македонија.
Иако долгорочните прогнози не се целосно прецизни, трендот е јасен: летото ќе биде екстремно. Затоа, се препорачува редовно следење на временските предупредувања, избегнување престој на отворено во најтоплиот дел од денот (од 11 до 17 часот), внесување доволно течности и зголемена грижа за најранливите – постарите лица, децата и хронично болните. При најави за силни бури, граѓаните треба да избегнуваат отворени простори и засолништа под дрвја.