Пешевска: Го повикувам Клубот на пратенички, жените од СДС и жените од сите други партии да застанеме јасно и заеднички против навредливиот говор кон жените

Навредата против жена е напад врз сите жени во јавниот живот

Жаклина Пешевска, претседателка на Унијата на жени на ВМРО-ДПМНЕ остро го осуди говорот со кој пратеничка беше наречена „монструм“.

„Навредата кон жена (без разлика на партиската припадност) е напад врз сите жени во јавниот живот!“, порача Пешевска, која е претседателка на Унијата на жени на ВМРО-ДПМНЕ и претседателка на собраниската Комисија за еднакви можности на жените и мажите.

Осуда на говорот и апел за заедничка реакција

„Остро го осудувам Слободан Трендафилов за навредливиот говор и обидите преку манипулација на работниците да гради личен и политички профит!“, истакна Пешевска. Таа додаде дека ваквиот говор не ја труе само политичката дебата, туку испраќа опасна порака до сите девојчиња и жени дека јавниот простор е место каде навредата е дозволена.

Повик за заштита на достоинството и женската храброст

„Тоа не смееме да го нормализираме! Дафина Стојаноска е пример за силна, гласна и храбра жена која не се повлекува пред притисоци и напади, туку достоинствено ја брани својата позиција“, нагласи Пешевска. Таа го повика Клубот на пратенички и сите жени во Собранието, без оглед на политичката боја, да застанат јасно и заеднички против ваквиот говор.

„Денес е нападната една пратеничка, утре метата може да биде било која од нас. Достоинството на жените во политиката е прашање на вредности и на демократска зрелост!“, додаде Жаклина Пешевска.