Помалиот син на премиерот Мицкоски меѓу тешко затруените ученици во Димо Хаџи Димов

Хоспитализација и здравствена состојба

Помалиот син на премиерот Христијан Мицкоски е еден од тешко затруените ученици од основното училиште Димо Хаџи Димов во скопската населба Влае, општина Карпош, дознава НетПрес.

Извори наведуваат дека тој бил хоспитализиран и поминал два дена во болница со симптоми на труење и зголемена телесна температура. Моментално неговата здравствена состојба е подобрена.

Масовно труење и прекин на настава

Како што претходно објавивме, голем број ученици од Димо Хаџи Димов пријавиле симптоми на труење, а дел од нив биле хоспитализирани. Школото ги ослободило од настава сите класови од прво до петто одделение.

Исто така, голем број ученици од класовите од шесто до деветто одделение биле ослободени од настава. Овие мерки биле воведени за да се спречи понатамошно ширење на симптомите и да се обезбеди безбедноста на учениците.

Сомнежи за изворот на труењето

Првичните сомнежи укажуваат дека проблемот може да биде или водата за пиење или храната од мензата каде децата се хранат. Екипи на скопски Водовод веќе земале примероци од водата и ги испитуваат во своите лаборатории.

Агенцијата за храна и ветерина исто така врши истражни активности за да утврди дали труењето е поврзано со храната во мензата. Сепак, преовладува мислењето дека труењето е предизвикано од водата за пиење.

Родителите на децата претпоставуваат дека, поради градежни активности за реновирање на спортската сала во училиштето, бил оштетен системот за довод на вода, што довело до загадување.