Директорот на Клиниката потврди два лабораториски случаи
Двајца пациенти со лабораториски потврдена Западнонилска треска се хоспитализирани на Универзитетската клиника за инфективни болести и фебрилни состојби, информира директорот на установата, Фадил Цана.
Според него, двајцата пациенти се под постојан медицински надзор и примаат терапија согласно современите медицински препораки.
„Нивната здравствена состојба внимателно се следи“, информира Цана.
Апел за заштита од убоди од комарци
Од Клиниката потсетуваат дека Западнонилската треска е вирусно заболување кое се пренесува преку убод од инфициран комарец. Кај најголемиот дел од заразените лицата нема симптоми или тие се благи, но кај повозрасни лица и кај лица со ослабен имунитет може да се развијат сериозни невролошки компликации.
Здравствените власти апелираат граѓаните да користат репеленти, да носат облека со долги ракави и ногавици при престој на отворено, да поставуваат заштитни мрежи на прозорците и да ја отстрануваат застојаната вода во која се размножуваат комарците.
Нема простор за паника, но потребна е претпазливост
Од Инфективната клиника посочуваат дека во моментов нема причина за паника, но апелираат на зголемена внимателност во текот на летните месеци кога активноста на комарците е најголема.
Граѓаните кои по убод од комарец ќе добијат висока температура, силна главоболка, вкочанетост на вратот, нарушена свест или други невролошки симптоми треба веднаш да побараат лекарска помош.
Оттаму додаваат дека Клиниката останува во постојана координација со надлежните здравствени институции и внимателно ја следи епидемиолошката состојба, особено имајќи предвид дека според последните европски извештаи, оваа сезона веќе се регистрирани случаи на Западнонилска треска во регионот.