Примирје од 8 до 11 мај во Украина за прославите на Денот на победата
Рускиот претседател Владимир Путин објави примирје од 8 мај до 11 мај во Украина. Оваа одлука е донесена по повод одбележувањето на Денот на победата над фашизмот во Втората светска војна.
Кремљ порача дека Русија очекува украинската страна да го почитува примирјето. Доколку дојде до прекршувања, Руската Федерација најави соодветен и ефективен одговор.
САД и Украина со различни барања за прекин на огнот
Како одговор на најавеното примирје во Украина, украинскиот министер за надворешни работи Андриј Сибиха побара прекин на огнот кој би траел најмалку 30 дена. Од друга страна, Белата куќа соопшти дека Доналд Трамп бара траен прекин на огнот и стабилен мировен договор.
Претходно, за велигденските празници беше прогласено 30-часовно примирје, кое беше проследено со меѓусебни обвинувања за прекршувања од двете страни.
Москва и Вашингтон најавуваат клучна недела за мировните разговори
Кремљ изрази подготвеност за мировни преговори без предуслови, насочени кон решавање на основните причини за конфликтот. Тие повикаа на конструктивна интеракција со меѓународните партнери.
Во исто време, американскиот државен секретар Марко Рубио изјави дека мировните разговори влегуваат во клучна недела. Тој додаде дека постои оптимизам, но и потреба од реализам. Рубио нагласи дека е неопходно наскоро да се утврди дали двете страни навистина сакаат мир.