„Лукоил“ го продава целиот имот во странство
Рускиот нафтен гигант „Лукоил“ објави дека постигнал договор со групацијата „Гунвор“ за продажба на сите свои средства во странство, вклучувајќи ги и филијалите на Балканот. Одлуката доаѓа како резултат на американските санкции кои значително го ограничуваат работењето на компанијата надвор од Русија.
Договорот со „Гунвор“ и условите на продажбата
Според информациите на Нова.рс, клучните услови на трансакцијата веќе се усогласени меѓу двете страни. „Лукоил“ потврди дека ја прифатил понудата на „Гунвор“ за купување на „Lukoil International GmbH“, со седиште во Австрија, и дека нема да преговара со други потенцијални купувачи. За финализирање на продажбата е потребна дозвола од американската Канцеларија за контрола на странски средства (OFAC), која воведе санкции против „Лукоил“.
Последици за регионот и позадината на купувачот
Со продажбата на „Lukoil International GmbH“ ќе бидат опфатени и подружниците на компанијата во регионот, меѓу кои и онаа во Македонија. Од „Лукоил“ истакнаа дека ова е директна последица на рестриктивните мерки на повеќе држави. Новиот купувач, „Гунвор“, е една од најголемите светски компании за трговија со сурова нафта, регистрирана на Кипар и основана од шведскиот милионер Торбјорн Торнквист и рускиот олигарх Генадиј Тимченко. По почетокот на војната во Украина, „Гунвор“ целосно престана да тргува со руска нафта.
Извор: Слободен печат