СÈ УШТЕ СЕ АКТИВНИ ПЕТ ПОЖАРИ: До 18 часот регистриран 21 пожар на отворен простор

На територијата на државата до 18 часот денеска биле регистрирани вкупно 21 пожар на отворен простор. Од нив, пет се активни, пет се ставени под контрола, а 11 се изгаснати, соопшти Центарот за управување со кризи (ЦУК).

Според информациите од ЦУК, активен е пожарот во Општина Струга, на потегот меѓу селата Буринец, Локов, Селце и Елевци, каде што гори високостеблеста шума. Во Општина Македонски Брод активен е пожарот кај селото Белица, во месноста Кајорец, кој зафатил нискостеблеста и мешана шума.

Огнот сè уште е активен и кај селото Брест, во месноста Рамно во Општина Чучер-Сандево, каде што гори мешана шума. Во Општина Ново Село активни се два пожара – кај селото Стиник, каде што е зафатена ниска вегетација, и на потегот од селото Борисово кон селото Колешино, каде што гори ниска вегетација и нискостеблеста шума.

Под контрола е шумскиот пожар кај селото Бенче во Општина Македонски Брод. Контролирани се и пожарите кај селото Тајмиште, во месноста Дарда, каде што горела ниска вегетација, како и кај селото Кнежино, на местото викано Црн Камен, каде што биле зафатени ниска вегетација и пенушки. Двата пожара се на територијата на Општина Кичево.

Под контрола се ставени и пожарот на градската депонија во Општина Делчево, каде што горело ѓубре, и пожарот кај селото Осиче во Општина Крива Паланка, кој зафатил ниска вегетација.

Како што соопшти ЦУК, изгаснати се пожарите кај селото Враништа, каде што горела дива депонија, и кај селото Радолишта, каде што била зафатена депонија, двата на територијата на Општина Струга. Изгаснат е и пожарот во кумановската населба Перо Чичо, кој зафатил ниска вегетација и ѓубре.

Во Општина Карпош се изгаснати пожарите кај Железни Мост и на булеварот „Илинден“, во близина на „Водовод“, каде што горела ниска вегетација. Локализиран и изгаснат е и пожарот кај селото Крушеани во Општина Кривогаштани, кој исто така зафатил ниска вегетација.

Изгаснати се и пожарот на депонијата кај селото Банско во Општина Струмица, пожарот кај селото Желино во Општина Желино, каде што гореле ниска вегетација и ѓубре, како и пожарот кај селото Вратница во Општина Јегуновце, кој зафатил ниска вегетација.

Целосно се изгаснати и пожарот во шума кај селото Грачани во Општина Ѓорче Петров и пожарот кај хотелот „Њу Стар“ во Општина Шуто Оризари, каде што гореле ѓубре и ниска вегетација.