Продолжуваат жестоките судири околу Ормускиот теснец
Американската воена команда соопшти дека започнала нова рунда напади врз Иран, насочени кон крајбрежни воени објекти кои, според Вашингтон, претставуваат закана за комерцијалниот поморски сообраќај. Во меѓувреме, иранските власти објавија дека во американските напади врз јужниот дел на земјата во последните неколку дена загинале повеќе од 30 цивили, а околу 260 лица биле повредени.
САД и Иран продолжија со меѓусебни напади во текот на ноќта, додека конфликтот околу Ормускиот теснец дополнително се продлабочува. Американскиот претседател Доналд Трамп повторно се закани со напади врз цивилна инфраструктура доколку Техеран не прифати преговори.
Според Централната команда на САД (CENTCOM), најновите операции биле насочени кон ирански поморски капацитети, крајбрежни одбранбени системи, како и позиции за ракети и беспилотни летала долж брегот.
Од друга страна, портпаролката на иранската влада, Фатемех Мохаџерани, соопшти дека повеќе од 30 цивили биле убиени во американските напади врз јужен Иран.
Иранската војска соопшти и дека во напад со 13 американски ракети загинале седум нејзини припадници, оценувајќи го нападот како „кукавичка агресија“ и најавувајќи одмазда.
Иран тврди дека погодил американски бази во регионот
Исламската револуционерна гарда соопшти дека нападнала американски воени објекти во Бахреин, Кувајт и Јордан, како и дека му нанела тешка штета на седиштето на Петтата флота на САД.
Во одделни соопштенија се тврди дека биле погодени засолништа за борбени авиони во воздухопловната база Ал Азрак во Јордан, како и центар за сателитски комуникации, радарски системи, комплекс „Патриот“ и логистички објекти во американска база во Кувајт.
Иранската агенција „Фарс“ објави дека најмалку едно беспилотно летало погодило американски објект во Кувајт, но обемот на штетата засега не е познат.
Во исто време, Кувајтската армија соопшти дека нејзината противвоздушна одбрана пресретнувала беспилотни летала, вооружените сили на Јордан информираа дека собориле три ракети лансирани од Иран, а Министерството за внатрешни работи на Бахреин објави дека биле активирани сирените за тревога.
CENTCOM претходно соопшти дека Иран во последните седум дена нападнал седум комерцијални бродови, при што имало речиси десетина цивилни жртви. Во напад врз брод во понеделник загинал и еден индиски државјанин.
Трамп најавува нови удари, а Конгресот ја оспорува правната основа
Доналд Трамп изјави дека американската војска ќе продолжи со силни напади врз Иран и најави дека наредната недела би можеле да бидат погодени електрани и мостови.
„Следната недела доаѓаат електраните. Следната недела доаѓаат мостовите“, рече тој.
„Ќе ги срушиме сите нивни електрани. Ќе ги срушиме сите нивни мостови освен ако не седнат на маса и не преговараат.“
Американскиот претседател испрати официјално известување до Конгресот дека непријателствата против Иран повторно се активирани од 7 јули. Администрацијата смета дека со тоа започнал нов рок од 60 дена за употреба на воена сила без претходно одобрение од Конгресот.
Таквото толкување го оспоруваат демократите и дел од републиканците, кои предупредуваат дека претседателот нема овластување самостојно да води продолжена воена кампања.
Минатиот месец Сенатот и Претставничкиот дом усвоија резолуција со која побараа американските сили да бидат повлечени од непријателствата со Иран, што укажува на растечката загриженост во Конгресот поради продолжувањето на конфликтот.