Семејствата бараат нова истрага

Пред Основниот суд во Тетово, семејствата на жртвите од Модуларната болница во Тетово одржаа прес-конференција, изразувајќи незадоволство од досегашниот тек на судскиот процес и барајќи нова, независна истрага. Нивниот апел е дел од јавното писмо на Иницијативата „Нула“ до државниот јавен обвинител Љупчо Коцевски.

Говорејќи во име на семејствата, Агрон Арифи истакна дека постојат сериозни докази кои, според нив, биле игнорирани од Обвинителството.

„Целата јавност знае дека постојат сериозни докази за пропусти при изградбата на модуларната болница кои можат да бидат единствени причини за пожарот. Тоа беше потврдено и со германското вештачење – независен и кредибилен доказ кој, за жал, беше отфрлен од обвинителството. Затоа, драг Љупчо, како наш сограѓанин од Тетово, Вие најдобро ја разбирате болката и гневот на семејствата на жртвите и на целата заедница. Ова не е само правно прашање. Ова е морална обврска – кон тие што ги изгубивме, но и кон сите граѓани што денес живеат со страв дека ова може да се повтори, а никој нема да одговара,“ рече Арифи.

Семејствата на жртвите од Модуларната болница во Тетово побараа конкретни чекори од Јавното обвинителство:

  • Формирање независен истражен тим што ќе го разгледа случајот од почеток

  • Истрага за можни обиди за одолговлекување на постапката

  • Заштита на процесот од политички и бизнис влијанија

  • Прифаќање на германското вештачење како суштински доказ

„Време е некој да преземе одговорност. Време е правдата да излезе од фиока. Како семејства на загинатите, бараме од Вас: – Да формирате независен тим кој ќе ги испита сите аспекти на случајот, вклучително и евентуалното одолговлекување на постапката. Да гарантирате дека судската постапка ќе се води без политичко-бизнис влијание. Да обезбедите транспарентност и отчетност во Вашата работа, во согласност со законските обврски. Да го земете германското вештачење како клучен доказ во истрагата. Ние нема да молчиме. Ќе продолжиме да зборуваме за нашите најблиски кои ги изгубивме, за вистината, за правдата која е ветена, но никогаш донесена,“ порача Арифи.

Во меѓувреме, во Основниот суд во Тетово продолжи доказната постапка во рамки на повторното судење за трагедијата, во кое обвинети се двајца поранешни директори на болницата и ЈЗУ Клиничка болница Тетово како правно лице.

Извор: Курир