Швајцарската влада соопшти дека поддржува вонсудско решавање на случајот со пожарот во бар во ски-центарот Кран-Монтана, во кој загинаа десетици лица, претежно млади.
Формирана тркалезна маса за дијалог
Владата во Берн го назначи економистот и поранешен кантонален политичар Лоран Курт за претседател на тркалезна маса. Таа треба да ги обедини жртвите, нивните семејства, осигурителните компании, потенцијално одговорните лица и институциите.
„Курт има богато искуство во управување со сложени процеси со многу засегнати страни“, се наведува во соопштението.
Целта е вонсудски договори
Како што информираат властите, целта на оваа иницијатива е да се олесни дијалогот меѓу засегнатите страни и да се постигнат вонсудски договори, наместо долготрајни судски постапки.
Пожар за време на новогодишна прослава
Трагедијата се случила за време на новогодишна прослава во барот „Ле Констеласион“, при што загинале 41 лице, а околу 80 биле повредени, повеќето со тешки повреди. Според информациите, искри од пиротехнички фонтани ја запалиле пената на таванот.
Сопствениците на барот, Џесика и Жак Морети, како и неколку градски службеници, се под истрага за небрежно предизвикување смрт, телесни повреди и пожар. Објектот, спротивно на прописите, не бил проверен за противпожарна заштита од 2019 година.