Претседателката Сиљановска Давкова се потпиша во Книгата на жалост и оствари разговор со српскиот претседател

Претседателката на Република Македонија, Гордана Сиљановска Давкова, денеска го посети српското дипломатско претставништво во Скопје за да изрази сочувство по повод трагедијата на железничката станица во Нови Сад. Во Книгата на жалост отворена во амбасадата на Република Србија, Сиљановска Давкова остави порака на поддршка и солидарност со српскиот народ и со сите засегнати од настанот.

  • „Денеска со голема тага и искрено сочувство се потпишав во Книгата на жалост што е отворена во Амбасадата на Србија во Скопје, изразувајќи солидарност и поддршка поради трагичниот настан на железничката станица во Нови Сад,“ објави на Фејсбук претседателката на Република Македонија, Гордана Сиљановска Давкова.

Мисли и молитви за жртвите и нивните семејства

На социјалните мрежи, претседателката објави порака во која ги сподели своите мисли и молитви за жртвите и нивните блиски, истакнувајќи дека особено жали за загубата на животот на еден македонски државјанин. Таа ја изрази својата длабока тага за сите засегнати од трагедијата и испрати порака на сила и издржливост за семејствата на загинатите.

  • „Моите мисли и молитви се со семејствата и најблиските на оние што го загубија животот во трагедијата, вклучувајќи го и македонскиот државјанин,“ додаде таа.

Телефонски разговор со српскиот претседател Вучиќ

Во знак на поддршка, Сиљановска Давкова утрово оствари телефонски разговор со претседателот на Србија, Александар Вучиќ, на кого му го пренесе своето лично сочувство и солидарност. Таа го увери српскиот претседател дека Македонија стои покрај српскиот народ во овие тешки моменти на жалост.

  • „Во духот на почит и солидарност, утрово разговарав телефонски со српскиот претседател Александар Вучиќ и му го пренесов моето длабоко сочувство и поддршка во овие тешки моменти,“ заврши Сиљановска Давкова.