Струга, 21 септември 2024 – Жителите на Струга денеска организираа протест против отворањето на ново казино во нивната околина. Со јасни пораки, тие побараа од надлежните институции да спречат отворање на уште едно казино во градот и да ги регулираат игрите на среќа, особено во близина на училишта и домови.

Барања за итно регулирање на казината

Присутните на протестот поднесоа официјално барање до општината и ресорните министерства за да ги стопираат работите. Велат дека на кратко успеале да го прекинат проектот, но дека по заминувањето на сезонските жители, работите повторно почнале.

„Не е прифатливо во станбени комплекси да се отвора казино. Имаме деца, внуци, и ова не е средина каде што треба да се наоѓаат вакви објекти. Веќе доставивме барање до институциите, но се чини дека работите само привремено беа стопирани,“ изјави Жарко Мукоски, жител на Струга.

Строги ограничувања за игрите на среќа

Граѓаните бараат од државата да воведе законски ограничувања за локацијата на казина и објекти за игри на среќа. Сметаат дека тие не треба да се наоѓаат во близина на образовни институции, станбени објекти и градинки.

„На само неколку метри одовде има основно училиште и градинка. Таквите објекти треба да бидат подалеку од урбаните населби, а државата треба да го реши ова прашање преку законски промени,“ нагласи Асим Муса, жител на Струга.

Муфтиството поддржува целосно затворање на казината

Муфтиството на Исламската верска заедница во Струга го поддржа протестот, повикувајќи на целосно затворање на казината. Според нив, овие објекти предизвикуваат значителни социјални и морални проблеми.

„Казината се штетни за нашето општество. Ги поддржуваме граѓаните и ќе продолжиме да се залагаме за нивно целосно отстранување од градот и државата,“ изјави Ади Муртиши, муфтија на ИВЗ Струга.

Апел до Владата за исполнување на ветувањата

Протестантите ги повикаа властите да ги исполнат ветувањата за затворање на казината, особено оние што се наоѓаат во близина на училишта и населени места.

„Владата вети затворање на казината за време на својата кампања, а сега е време да го исполни тоа ветување. Ова е сериозен проблем што го засега целото општество,“ изјави Бесник Асани, еден од протестантите.

Струга се претвора во центар на коцкањето

Жителите се загрижени дека нивниот град, некогаш познат по својата културна историја и поезија, сега станува препознатлив по големиот број казина. Според нив, во Струга има повеќе од 50 казина и спортски обложувалници, многу од нив во близина на училишта и градинки.