Министерот за внатрешни работи, Панче Тошковски, предупреди на растечкиот број измами преку онлајн пирамидални шеми како што е „Конти“, кои ги таргетираат граѓаните со ветувања за брза заработка. Тој ги повика граѓаните да бидат внимателни со ризични инвестиции преку апликации кои претставуваат потенцијална опасност и да не подлегнуваат на овие платформи за пирамидални измами. Министерството информира дека досега нема поднесени кривични пријави за овие случаи, но ги охрабри сите кои се жртви на ваквите шеми да го пријават случајот на надлежните органи за понатамошна истрага.
„Ги повикувам сите кои се жртви на овие апликации да ги пријават случаите на надлежните органи“, истакна Тошковски.
Безбедносните камери за сообраќај: Нема можност за бришење казни, вели Тошковски
Министерот Тошковски објасни дека новите безбедносни камери во сообраќајот поставени по патиштата ќе бидат целосно функционални и ќе спречат каква било можност за манипулации и бришење на казните. Оваа мерка ќе помогне во значително намалување на сообраќајните прекршоци и воспоставување строга контрола врз сообраќајот. Со новиот систем, нема да има можност за ургенции за укинување на казни, што ќе доведе до поефективно спроведување на законите.
Сработеното во првите 100 дена: нормализација на секторот за лични документи
Тошковски, при прес-конференцијата за сработеното во првите 100 дена на функцијата, нагласи дека затекнал хаос во секторот за издавање лични документи, но со отворањето на нови пунктови за фотографирање, ситуацијата е стабилизирана. Тој додаде дека проблемот со нефункционалната веб-страница за аплицирање за лични документи ќе биде решен во краток рок.