Македонија очекува Бугарија да ги испорача лицата што се бараат со потерница, за да се соочат со правдата, изјави вечерва вицепремиерот и министер за транспорт Александар Николоски. Тој зборуваше за случајот со Ива Михаилова, по која денеска беше распишана меѓународна потерница, откако таа деновиве заминала во Бугарија.

Во гостувањето во емисијата „Колегиум“ на телевизија Алфа, Николоски рече дека Министерството за надворешни работи прецизно се изјаснило за случајот. Тој заминувањето на Михаилова го оцени како бегство од правдата и ја повика Бугарија, како членка на НАТО и ЕУ, да постапи по потерницата.

„Мислам дека Министерството за надворешни работи имаше доста прецизна комуникација за овој дел. Кажаа дека таа практично избегала од Македонија, а денеска е распишана и меѓународна потерница. Беа прилично јасни дека се работи за класично бегство од правдата. Очекуваме Бугарија, како земја членка на НАТО и на Европската Унија и како развиена демократија во која се почитува владеењето на правото, да ги испорача лицата што се бараат со потерница за да се соочат со правдата“, рече Николоски.

Осврнувајќи се на реакциите во Бугарија и најавите за средби на високо ниво, тој рече дека Македонија не треба да подлегнува на провокации. Николоски ги посочи домашните институции и Европскиот суд за човекови права во Стразбур како патишта за разгледување на прашањата поврзани со човековите права.

„Како што реков, МНР веќе искажа став и немам што дополнително да додадам. Ова не е првпат, имаше вакви случаи и во минатото. Мислам дека треба да бидеме паметни и да не паѓаме на провокации. Во Европа има институции кои кажуваат дали се прекршени човековите права или не. Прво, има домашни институции: Комисија за заштита од дискриминација, судови и други органи. Доколку не им веруваат на нив, тука е Европскиот суд за човекови права во Стразбур. Колку што знам, таа личност нема ниту поднесено апликација таму, а камоли судот да донел одлука. Доколку добие пресуда од релевантна европска институција како Стразбур, ќе ја почитуваме. Но, врз основа на никакви докази и факти, јасно е дека се прави само политичка злоупотреба“, рече вицепремиерот.

Николоски упати критики и кон опозициската СДСМ, обвинувајќи ја дека дејствува спротивно на државните интереси и во координација со структури во Бугарија. Тој појасни дека нема докази за поврзаност со конкретни лица, но наведе пример за кој смета дека укажува на координација.

„Најголемиот проблем е што кај нас има политичка партија која до 2024 година ја водеше владата, а која оди по нивните ноти … Мислам дека СДСМ работи во координација со одредени структури во Бугарија. Немам докази за да кажам дека работи во координација со точно одредени личности, но работи со одредени структури во Бугарија. Еве ќе ви го кажам последниот пример. Минатата среда бев на интервју кај вашиот колега Љупчо Златев, каде кажав тоа што сум го кажувал и претходно – дека дел од договорот што го потпиша Зоран Заев беше продажба на неколку македонски приватни компании на бугарски компании. И прашав: како е можно двајца премиери кои водат држави да договараат продажба на приватни компании? Веќе до 12:00 часот СДСМ одржа прес-конференција со напади кон мене. А околу 14:15 часот се огласи Виктор Стојанов од Фондацијата „Македонија“ со напади кои беа целосно синхронизирани со оние од СДСМ“, истакна Николоски.