Трамп привремено го одложи воведувањето царини од 50 отсто за Канада

Претседателот на Соединетите Американски Држави, Доналд Трамп, го одложи за три дена воведувањето царини од 50 проценти за одредени стоки од Канада.

Царините требаше да стапат на сила во 12:01 часот по источно време, но Трамп објави дека ги суспендира до крајот на 21 август, додека документите за договорот меѓу САД и Канада се финализираат, објави CNN.

Трамп изјави дека Канада и САД постигнале договор, под услов документите да бидат комплетирани.

Тој, исто така, ја спомена можноста за рестартирање на гасоводот „Keystone XL“, но без дополнителни детали.

Предложените царини би опфатиле производи како млечни производи, алкохол и мебел, кои претставуваат околу пет проценти од вкупната вредност на американскиот увоз од Канада минатата година.

Одлуката за одложување дојде по неколкудневни преговори.

Трамп и канадскиот премиер Марк Карни разговараа во понеделникот и вторникот, а Карни ги опиша преговорите како „многу деликатни и интензивни“.

Тој потврди дека царинските давачки се одложени и рече дека е постигнат значителен напредок, но дека треба да се направи уште многу.

Трамп планираше да употреби малку познат закон од 1930-тите, познат како „Член 338“ за да воведе царини, кои никогаш порано не биле користени на овој начин.

Се очекуваше дека неговата примена ќе биде оспорена пред судовите.

За разлика од некои други закони, „Член 338“ не предвидува временско ограничување, па царините би можеле да останат на сила на неодредено време, сè додека Трамп или идниот претседател не ги откаже.

Опсегот на царините би бил широк и нема да се однесува само на производи за кои Трамп ја критикувал Канада, како што се млечни производи, автомобили и алкохол.

Тоа би вклучувало и индустриска опрема, пластика, мебел, облека и други произведени стоки.

За разлика од некои од претходните царини на Трамп, нема да има ослободување од одговорност за стоки што се квалификуваат според трговскиот договор САД-Мексико-Канада.

Ова значи дека производите што имаат право на преференцијален третман според тој договор би можеле да бидат опфатени и со царински давачки.

Карни претходно процени дека ваквите тарифи би претставувале директно кршење на договорот, додека Американската стопанска комора предупреди дека тие би можеле да ги зголемат трошоците за американските семејства, да ги нарушат синџирите на снабдување и да ги загрозат работните места што зависат од трговијата меѓу трите земји, пренесува Танјуг.