Возачите во Соединетите Американски Држави плаќаат повеќе од кога било за дизел на бензинските пумпи, бидејќи американско-израелската војна со Иран продолжува да ги празни џебовите на Американците. Дизелот се користи главно во комерцијални возила во САД, како што се камиони, возови, бродови, автобуси, земјоделски и градежни возила.
Просечната цена на галон (3,785 литри) дизел во САД достигна 5,85 долари, во споредба со просекот од 3,71 долари пред една година. Тоа значи дека Американците плаќаат просечно 1,55 долари за литар дизел. Цената сега е повисока од претходниот рекорд поставен по руската инвазија на Украина, соопшти Американската автомобилска асоцијација (AAA).
Цените на горивата нагло пораснаа откако започна конфликтот со Иран кон крајот на февруари, поттикнат од порастот на цените на големо на нафтата.
Договор за нафта со Венецуела
Претседателот на САД, Доналд Трамп, неодамна, како одговор на зголемените трошоци за гориво, вети „значително да ги намали цените на горивата за сите Американци“ преку договор за нафта со Венецуела. Во јануари, американските специјални сили го заробија поранешниот венецуелски лидер Николас Мадуро во операција овластена од претседателот Трамп.
Најновиот договор, објавен во саботата, предвидува развој на 17 стратешки нафтени полиња со докажан потенцијал од 65 милијарди барели нафта, како и „инвестиција од повеќе од 100 милијарди долари и повеќе од 209 милијарди долари даноци“ за Венецуела, според привремената претседателка на Венецуела, Делси Родригез.
Владата на САД ќе задржи 55 проценти контрола врз заедничкото вложување со „искусен приватен оператор во Венецуела“, изјави неименуван американски функционер за CBS News.
Но, некои аналитичари го гледаат договорот со скептицизам и се прашуваат дали ќе ги отстрани долгогодишните пречки што ги одвраќаа инвеститорите од инвестирање во нафтената индустрија на Венецуела.
Гневот на американските гласачи пред среднорочните избори
Нафтата е клучен извор на гориво, а залихите се ограничени откако Иран, како одговор на војната, ефикасно го затвори Ормутскиот теснец, тесен морски премин јужно од Иран, кој носи една петтина од светската нафта.
Наглиот пораст на цените на горивата ги налути американските гласачи пред клучните среднорочни избори во ноември. Според неодамнешната анкета на Ројтерс/Ипсос, рејтингот на одобрување на Трамп падна на 33 проценти, додека само 31 процент од Американците го поддржуваат конфликтот.
Сепак, зголемувањето на цените не е униформно низ целите Соединети Американски Држави. Според ААА, жителите на западните држави плаќаат значително повеќе од жителите на другите делови од земјата, поради даночните разлики и оддалеченоста од американските производители на нафта.
На пример, во државата Вашингтон, просечната цена на дизелот е 6,81 долари за галон, што е зголемување од 5,03 долари пред една година. Покрај високите цени на дизелот, Американците се соочуваат и со историски високи цени на бензинот. Просечната цена на галон бензин достигна 4,15 долари, во споредба со 3,20 долари пред една година.